Contact tracing gipangusgan

CEBU, Philippines — Mas pangusgan karon sa kapolisan ang contact-tracing sa mga tawong nakauban sa mga nagpositibo sa novel coronavirus matud pa ni Police Regional Office 7 Director Police Brigadier General Albert Ferro.

Ang director miingon nga miabot na og 909 ka tawo ang ilang na-trace. Sila kadtong mga adunay close-contact sa mga nagpositibo sa novel coronavirus disease 2019, silang tanan dinhi lang gikan sa Cebu City.

Gisugdan ang lapad nga contact-tracing niadtong Domingo nga gilangkuban sa 35 ka team gikan sa kapulisan ug sa kagamhanan sa dakbayan.

Sa pagkakaron, aduna nay 79 ka teams ang PRO-7 ug madugangan pa kini gikan sa pwersa sa Bureau of Fire Protection 7 nga motabang kanila pagsubay sa mga           tawo.

Gi house-to-house ang mga tawong nakauban sa mga pasyenteng positibo sa COVID-19 aron sila patubagon sa mga pangutana nga maoy basehan kun kinahanglan silang ipaubos sa PCR test. Kun mapositibo gani, dad-on kini sa mga isolation area sa dakbayan.

“The protocol  man gud is, it is better to remove those positive individual confirmed cases from outside of their abode or their residence and bring them to a isolation facilities like sa barangay isolation facility or the designated quarantine area para we could control the spread of the disease,” dugang ni Ferro.

Ang matag team nag langkob kini sa mga medical personnel o health official, police, usa ka swabber ug usa ka analyst. /IBM (BANATNEWS)