Gealon: Cebu City wala mogasto sa tuob

CEBU, Philippines — Gihimakak sa kagamhanan sa Dakbayan sa Sugbo nga nigamit sila og pundo alang sa pagpalit og steam inhalation kits o tuob kits tungod kay donation kini.

Kini maoy gipahibawo ni Atty. Rey Gealon, tigpamaba ni Cebu City Mayor Edgardo Labella atol sa press briefing niini kagahapon human nahimong kontrobersiyal ang giingong pagpamalit sa siyudad og tuob kits nga nibalor ngadto sa P2.5 million.

Matud ni Gealon nga adunay giandam nga mga dokumento ang Bids and Award Committee kabahin sa pagpamalit og tuob kits apan sa kataposan wala motugot niini si Labella.

“Ang BAC in anticipation, gaandam daan sa maong papel considering nga dinalian ni tanan, we are in the state of pandemic apan kinahanglan sabton nato nga kining tanan bisag kompleto na ang papel nga giandam sa BAC subject to the approval of the mayor nga diin gibarogan na daan sa mayor nga dili siya motugot nga dunay kwarta o pundo sa siyudad nga gamiton alang sa pagpalit niining maong tuob kit”, tipik sa pamahayag ni Gealon.

Wala gibutyag sa kagamhanan sa  siyudad ang supplier nga ni-donate sa tuob kits nga gilangkuban sa electric kettle, duha ka hand towel, usa ka bath towel, steam down, monobloc chair ug gamay nga planggana.

Sayo pa, si Labella nihimakak nga nihatag siya og pagtugot sa paggamit sa pundo sa siyudad aron pagpalit sa tuob kits ug giingong wala siya mopirma og dokumento o kaha purchase orders alang sa maong katuyoan.

Nasayran nga usa sa mga nangusog gyud niining tuob mao si Konsehal Jerry Guardo.

Sa iyang bahin, si Guardo niklaro nga niadtong Mayo 11, 2020 uban ni Konsehal Nestor Archival nipalabang sila og resolusyon nga adunay resolving clause nga nag-request sa executive department sa pagtuon sa benefit sa steam inhalation therapy o tuob sa pagpakigbatok sa covid-19.

Matud ni Guardo nga wala sila nihisgot og budget allocation o appropriations alang sa pagpalit sa steam inhalation kits ug dihang na-approve kini sa council ilaha kining gipasa ngadto sa executive department aron matun-an kini.

Nunot sa maong kontrobersiyal pabor si Guardo sa imbestigasyon nga himuon sa siyudad.

“I have all the good intention sa pag-promote nako sa tuob, I just really wanted to help, in fact in my advocacy sa public ako gani silang gitudloan nga unsay gamit naa sa inyong balay kana lay gamita, all natural, barato kaayo. So I just really wanted unsay ma- contribute nako ba”, pasabot ni Guardo. /BDB (BANATNEWS)