75-anyos patay sa sunog

CEBU, Philippines — Usa ang patay sa sunog nga niulbo sa Purok Suliot, Barangay Looc, Lungsod sa Santander ala 1 pasado kagahapon sa kaadlawon.

Tulo ka balay ang apektado sa maong sunog diin duha ang hingpit nga naugdaw ug usa ang nakan-an sa kayo.

Ang namatay sa maong sunog mao si Emilio Magalso, 75, usa sa tag-iya sa nasunog nga balay.

Padayon pa nga nihimo og imbestigasyon ang kabomberohan sa hinungdan sa sunog ug gibana-bana nga moabot sa P40 mil ang danyos.

Giingong wala kagawas si Magalso atol sa sunog diin nagsugod sa iyang panimalay.

Si Magalso giingong namilin-bilin na sa ilang silingan nga adunay tawagan nga tawo sa higayon kung unsay mahitabo kaniya tungod sa gihambin niini nga sakit sumala pa ni Fire Investigator Joseph Yongco.

Sa laing bahin niabot sa 15 ka panimaye ang naugdaw sa sunog sa Purok Lingko, Barangay Cansojong, Dakbayan sa Talisay kagahapon sa hapon.

Ang kayo nagsugod sa pinuy-anan ni Sita Abellana, 70-anyos.

Si Senior Fire Insp. Arnel Abella, fire marshal sa siyudad, nibana-bana nga moabot sa P3.6 milyones ang danyos sa maong sunog. Gabriel C. Bonjoc/GMR (BANATNEWS)