2 ka trabahante sa pantalan sikop sa illegal nga drugas
CEBU, Philippines — Duha ka mga trabahante sa pantalan ang gidakop sa mga otoridad tungod sa paghupot og iligal nga drogas taliwala sa ilang transaksiyon sa Cebu City Port, Pier 6 niadtong Sabado sa gabii .
Ang duha nasikop sa mga tinugyanan sa Cebu Port Police uban sa mga tinugyanan sa Philippine Drug Enforcement Agency RO VII.
Giila ni Port Police Inspector Alyse Rosalejos ang mga suspek nga sila si Tirso Abella Viodor, 37, empleyado sa Cebu Integrated Arrastre ug Jonathan Apordo Gorre, 29, nagtrabaho usab isip shipper sa nahisgutang pantalan.
Si Viodor usa ka residente sa Barangay Pardo sa Siyudad sa Sugbo samtang si Gorre gikan usab sa Barangay Tinago.
Nasakmit gikan sa mga suspek ang 5 ka putos sa ginadili nga drugas nga motimbang og 1gram nga mobalor og 6,800pesos, lighter, 3 ka cellphone ug buy bust money.
"Ang buyer ana,niari sa amoa kay ang kaning seller, trabahante sa arraste sa pier,nya stay-in, ang buyer trabahante sad siya sa shipper," pamahayag ni Rosalejos.
Sumala sa interogasyon, giingon ni Rosalejos nga kini ang una nga higayon diin dunay nahitabong pagpamaligya og drugas sa pantalan. Dugang niya nga giangkon usab sa mga suspetsado nga adunay tighatagan kanila sa mga iligal nga drogas. Si Leia Albiar Alcantara, tigpamaba sa PDEA7 miingon nga ang maong operation igo lang gi-abagan sa ilang buhatan nga gipangulohan sa CPA Port Police.
Kasong kalapsan sa Article II of RA 9165 ang giandam sa mga suspetsado nga nagtingkagol na sa bilangguan. Iris Hazel Mascardo/MEL (BANATNEWS)
- Latest
