Upat ka opisyal sa NPA sikop

CEBU, Philippines — Upat ka tawo lakip na ang usa nga Sugboanon ang nadakop sa kasundaluhan atol sa follow-up operation sa 15th Infantry Battalion sa gituohang mga tag-as nga opisyal sa New People’s Army sa Sitio Mamposo, Magballo, Kabankalan City, Negros Occidental.

Usa sa dinakpan mao si Emmylo Cañares alyas Sid ug Drey, 38, lumad nga taga sa South Poblacion, San Fernando Cebu ug giingong kanhi finance officer sa Bohol Party Committee ug kasamtangang secretary sa Second National Urban Party sa komunista.

Ikaduha mao si George Buga-ay alyas Samantha ug Alexa, 42, taga Orong, Kabankalan City, kinsa kanhi squad leader ug finance logistics officer sa Regional Strike Forces sa Kilusan Rehiyon Negros ug kanhi secretary-general sa Pamalakaya Negros ug siya usab karon ang kasamtangang regional communication sa Kilusang Rehiyon Negros.

Ikatulo si Relyn Morena alyas Sam, 22, taga Orong, Kabankalan City, kasamtangang regional communication staff sa NPA.

Ang ikaupat mao si Raffy Patajo alyas Paolo, 21, taga Sitio Montelo, Pinggot Ilog, Kabankalan City, kanhi squad finance logistics officer sa Platoon 3 ug squad leader sa Platoon 2 sa South West Front Kilusang Rehiyon Negros ug regional communication staff.

Matud ni Army Captain Cenon Pancito, tigpamaba sa 3rd ID sa Philippine Army, nga ang pagkasikop sa mga opisyal NPA kabahin kini sa ilang intelligence ug follow-up operation uban ang kapolisan human sa nahitabong engkwentro niadtong Hulyo 8 sa maong dakbayan.

Giingong talagsaon nalang mouli sa San Fernando si Cañares ug molabang lang kini paingon sa Probinsiya sa Bohol.

Nakuha gikan sa mga dinakpan ang armas ug mga eksplosibo, usa ka kalibre .45, usa ka .38 ug lima ka bala niini, upat ka hand grenades, kwarta nga balor sa P119,354, cellphones, nagkalain-laing USB ug subersibong dokumento sa NPA. /GMR (BANATNEWS)