Magtutudlo sikop sa buy-bust

CEBU, Philippines — Nadakpan ang tulo ka pusher og shabu sa buy-bust operation sa kapolisan sa Lungsod sa Cordova ug Dakbayan sa Lapu-Lapu nga naglakip sa usa ka magtutudlo sa pribadong tunghaan.

Si Police Lieutenant Jan Ace Elcid Layug, hepe sa Cordova Police Station, niila sa nadakpan nga si Roland Ligan, 36, taga Barangay Dapitan sa maong lungsod.  Matud ni Layug nga ang suspek ilang nakuhaan og 11 ka gagmay nga pakete sa shabu nga mokabat sa P3,300 ang kantidad.

Samtang si Police Colonel Clarito Baja, director sa Lapu-Lapu City Police Office, niila sa ilang dinakpan nga sila si Lea Sinugbohan, 22, ug Elymar Matidios, 28, taga Saac 1, Barangay Buaya sa maong dakbayan.

Matud ni Baja nga sa pagsukit-sukit nga gihimo ilang nasuta nga magtutudlo sa usa ka pribadong tunghaan si Sinugbohan nga nag-sideline sa pagpamaligya og shabu sa Sitio Mahayahay sa Barangay Bankal sa maong dakbayan.

Si Police Major Narciso Abapo, hepe sa Presinto 2 sa LLCPO, niingon nga ilang gipanid-an ang ilegal nga kalihukan ni Sinugbohan sulod sa pipila na ka adlaw. Nunot sa pagkasikop ni Sinugbohan ug kauban maoy nakuha ang 36 ka pakete sa shabu. /GMR (BANATNEWS)