Dugay nga resulta sa swab testing gikabalaka sa Bohol Provincial Police Office

CEBU, Philippines — Naghinaot ang Bohol Provincial Police Office (BPPO) nga magawas na ang resulta sa swab testing sa hepe sa Carmen Municipal Police Station.

Kini aron nga makaginhawa ug maibanan na usab ang kabalaka sa mga kapolisan ug pamilya niini.

Matud ni BPPO Director Police Colonel Joselito Clarito nga sa pagka karon sukad sa pagkamatay sa hepe sa Carmen niadtong Sabado padayon pa sila nagpaabot sa resulta. Giingon nga mogawas ang resulta human sa 14 ka adlaw tungod kay gidala pa sa Sugbo ang swab sample aron sa pagsuta kun nag positibo sa COVID19 ang hepe.

Namatay ang hepe sa Carmen Municipal Police niadtong Sabado sa hapon human matud pa makasinate ug paglisud sa paghawa hinungdan nga dali kini nga gidala sa tambalanan apan wa na kini matabang og nakabsan gyud sa iyang kinabuhi.

Dugang pa ni Clarito nga gikinahanglan pa nga dalhon sa Sugbo ang sample gumikan kay ang Vicente Sotto Memorial Medical Center (VSMMC) lamang ang  gitugotan sa Department of Health nga makapa gawas dayon sa resulta sa swab testing sa COVID19.

Una niini nagtinguha ang kadagkuan sa Philippine National Police nga motukod og laboratory sa Central Visayas aron mapadali ang pagpagawas sa resulta sa swab testing nga himoon sa kapolisan. Nanghinaot si Clarito nga dili unta  magpositibo sa COVID19 ang hepe sa Carmen Police Station. Hinuon sa pagka karon kasamtangan gi- lockdown ang tibuok police station sa lungsod sa Carmen ingon man gipaubos sa home quarantine ang  pamilya sa namatay nga hepe. – Sheriza Mae Uy/MEL

Mga traffic enforcer sa Mandaue nakabaton na og body camera

Aduna nay body camera ang mga traffic enforcer sa Dakbayan sa Mandaue nga maoy magamit aron masuta ang mga panghitabo atol sa ilang operasyon sa kadalanan sa syudad. Ang kadagkoan sa Traffic Enforcement Agency of Mandaue (Team) misiguro nga pinaagi sa pagpatapot og body camera sa ilang mga enforcers ilang masuta ang mga panghitabo sa karsada diin madestino ang maong mga enforcers.

Kini maoy paagi aron pagsusi kun nagtrabaho ba gyud ug tarong ang mga traffic enforcer ingon man dali usab nilang ma imbestigar kun ugaling makasugat sila ug mga reklamo.

Sigun sa gipahibalo  sa  Public Information Office(PIO) sa Dakbayan sa Mandaue  nga tuyo usab nila nga makalikay  ang mga traffic enforcer sa  paghimo og  dili maayong binuhatan sa pagtuman  sa ilang kaakohan sa kadalanan.

“The City of Mandaue headed by Mayor Jonas C. Cortes is committed to upholding good governance, transparency and accountability in every operation even in these hard times brought about by the COVID-19 pandemic,” pagbasa sa ilang post sa facebook. /MEL (BANATNEWS)