Cebu City Hall duha ka adlaw’ng isirado
CEBU, Philippines — Ang Cebu City Hall isirado kini sulod sa duha ka adlaw sugod karon Hulyo 9 hangtud sa Biyernes, Hulyo 10, 2020 tungod kay ipaubos sa disinfection ang tanang buhatan lakip na ang gawas nga bahin sa building ug common areas.
Matud ni Atty. Floro Casas, city administrator nga nagrekomendar usab sila og physical arrangement sa mga buhatan sa city hall aron gyud masunod ang physical distancing.
Si Casas nibutyag nga gihimo nila ang disinfection tungod kay nakita nila nga daghan na nga nagpositibo sa covid-19 diha sa city hall.
Sayo pa, gikataho nga niabot na ngadto sa 69 ka kawani sa kagamhanan sa siyudad ang nagpositibo sa covid-19 ug gani upat niini ang namatay.
Ang command center sa siyudad abli kini aron pag-akumodar gihapon sa mga concern sa katawhan ug kadtong field officers sa siyudad walay labot sa duha ka adlaw nga pagsira sa city hall o padayon gihapon ang ilang trabaho.
Dugang ni Casas nga aron maprotektahan ang mga empleyado sa city hall batok sa covid-19 niimplementar sila og skeletal working force diin kasagaran sa mga kawani ang nag-work from home aron limitado ang mga tawo nga magtrabaho diha sa city hall ug limitado usab ang paggawas-gawas o exposure sa mga kawani.
Ang kagamhanan sa siyudad nanghatag og face mask diha sa tanang buhatan sa city hall ug nanghatag usab sila og mga vitamin C ngadto sa tanang kawani. /BDB (BANATNEWS)
- Latest
