Kapolisan sa Minglanilla nangimbargo og quarantine passes
CEBU, Philippines — Subli nga gipahinumdoman sa kapulisan sa lungsod sa Minglanilla ang tanan nga dili gyud mogawas sa ilang panimay sa adlaw nga Domingo.
Kini human 18 ka quarantine passes ang ilang nasakmit gikan sa mga tawo nga nipugos gyud sa pagsuroy.
Si Police Master Sergeant Christopher Cesa sa Minglanilla Police Station nagkanayon nga kung importanti ang katuyuan sa paggawas mahimo ra kini nga itugot. Apan sa 18 ka tawo nga ilang gipangutana walay bisan usa kanila ang dunay balido nga rason hinungdan nga ilang gikumpiskahan og mga quarantine passes.
Matud pa ni Cesa nga nagbase sila sa Executive Order ni Mayor Elanito Peña nga nagmando nga igahin ang adlaw nga Domingo alang sa pag disinfect sa mga lugar ug mapugngan ang paggawas sa mga tawo.
Sa nasayran niabot na sa 211 ka kaso sa covid-19 ang natala sa lungsod sa Minglanilla hangtud niadtong Hulyo 6 ning tuiga.
Ang 111 ang aktibong kaso samtang 91 ang nakarekuber ug siyam ang nangamatay. /MEL (BANATNEWS)
- Latest
