Lockdown sa 32 ka panimaye sa dakbayan sa Naga gilibkas na
CEBU, Philippines — Gilibkas na sa kagamhanan sa Siyudad sa Naga ang targeted community lockdown sulod sa 32 ka panimaye sa Purok 3, Lower South, Barangay Tinaan.
Kini subay sa rekomendasyon ni City Health Officer, Dr. Regil Kent Villamor.
Matud ni Villamor nga wala nay mga molupyo sa dapit nga namatikdan nga adunay influenza-like illness o sintomas sama sa hilanat, ubo, sip-on, katol ang tutunlan ug uban pa.
Asoy pa ni Villamor nga subsob ang ilang pag-monitor sa panglawas sa molupyo.
Gawas sa sa City Health Office, ang Barangay Health Emergency Response Team (BHERT) maoy nagtinabangay aron lang maseguro ang kahimtang sa tanan.
Niadtong Hunyo 12 walo ka tawo sa nahisgutang lugar ang nakit-an nga nagpositibo sa COVID-19.
Dali nila kining gibalhin samtang naghimo sab og lockdown sa maong dapit aron kalikayan ang pagtinakdanay. Hinoon si Villamor nitataw nga bisan pa man sa paglibkas sa lockdown kinahanglan gihapon mosunod sa safety protocols ang mga molupyo. /GMR (BANATNEWS)
- Latest
