Wala makadawat og SAP hatagan og CT-SAP sa Talisay

CEBU, Philippines — Gipahibawo ni Talisay City Mayor Gerald Anthony “Samsam” Gullas Jr. nga dili pa sila makalihok sa pagpangita sa mga angayang mahatagan sa City-Social Amelioration Program (CT-SAP).

Kini tungod kay ilahang basehan sa mahatagan mao kadtong mga tawo nga wala makadawat sa Social Amelioration Program (SAP) nga ubos sa Department of Social Welfare and Development (DSWD).

Matud ni Gullas nga i-implementar nila ang maong pamaagi aron dili magmahay ang mga Talisaynon.

Giingong daghan na nga mga Talisaynon ang nipadangat og mensahe kabahin sa ilang pangutana kalabotan sa CT-SAP.

Gipasabot ni Gullas nga wala pa mahuman sa pagpanghatag sa ikaduhang hugna sa SAP.

Si Gullas nihangayo sa mga Talisaynon nga unta mosabot kini.

Si Gullas nagkanayon nga ang kagamhanan sa siyudad nituman kini sa ilang mga gimbuhaton aron matabangan ang mga Talisaynon niining panahon sa krisis.

Ang CT-SAP programa kini sa siyudad diin kadtong mga labing nagkihanglan wala makadawat og SAP gikan sa DSWD ang makadawat niini.

Apan matud ni Gullas nga gamay lang nga kantidad ang ilang mahatag.

Si Gullas wala mobutyag sa kantidad sa pundo nga igahin sa siyudad lakip na sa kantidad sa hinabang nga ihatag.

Ang kaso sa covid-19 sa Dakbayan sa Talisay padayon kini nga nagsaka hinungdan nga giawhag ang tanan nga magmatngon ug motuman sa protocols. /BDB (BANATNEWS)