Treasurer’s office sa Mandaue ‘lockdown’

CEBU, Philippines — Gipaubos sa “full lockdown” ang City Treasurer’s Office (CTO) sa Dakbayhan sa Mandaue sugod kagahapon hangtud ugma.

Gihimo ang maong lakang human usab nagpositibo sa coronavirus disease 2019 ang usa sa mga kawani niini hinungdan nga gipahigayon ang comprehensive decontamination procedure.

“We assure the public and our taxpayers that our Office has been strictly and fully implementing health standards and we have been limiting at most, face-to-face transactions. Our Office will still entertain your queries and matters through our Facebook page,” nagkanayon ang CTO sa ilang advisory.

Gipahibawo usab sa maong buhatan ang pagbalik sa ilang physical operation sa ilang mga kliyente sa Lunes, Hulyo 6, 2020.

Gikompirmar sa maong buhatan ang nagpositibo sa COVID-19 nga usa sa ilang mga staff nga kasamtangan na karon nga gi-admit sa hospital sa dakbayan.

Ang mao nilang kawani wala hinoon motambong sa trabaho sukad pa niadtong Hunyo 24 sanglit giawhag man kini nga magpaubos sa home isolation.

Gitataw sa CTO nga ang maong kawani wala nadestino sa public transactions sa ilang buhatan ug ang tanan nga personnel sa mao nilang buhatan nga adunay close contact niini ang gipaubos na usab sa 14 ka adlaw nga home quarantine. /GMR (BANATNEWS)