Panghatag sa QR coded pass padayon
CEBU, Philippines — Padayon nga gipanghatag ang QR coded quarantine passes sa 80 ka barangay sa Siyudad sa Sugbo.
Matud ni Atty. Rey Gealon, tigpamaba ni Mayor Edgardo Labella, nga dunay nangabot nga mga reklamo sa buhatan sa mayor kuwang pa ang QR coded passes.
Giklaro ni Gealon nga ang mga QR coded passes nga gipanghatag base kini sa data nga gisumetir sa buhatan sa mayor ug hangyo nila nga dili kini i-tamper.
Sumala pa ni Gealon nga mahimong maghuwamay og gamit sa quarantine pass ilabi na sa mga nagpuyo sa subdivision, villages, compounds ug condominium samtang wala pa makompleto ang matag household.
Ang kapolisan ug mga barangay tanod sa tagsa-tagsa ka barangay checkpoints gipasabot na nga hatagan og bili kadtong mga manggawas sa ilang tagsa-tagsa ka panimalay nga nagdala og QR coded quarantine pass nga ngalan sa compound, village, subdivision ug condominium.
Si Gealon niasoy nga ang buhatan sa City Administrator andam modawat og mga reklamo ug yangungo sa katawhan kun pananglitan duna sila’y masugatan nga problema.
Kun dunay makit-an nga mopeke sa QR coded passes segurado gyud nga mapasakaan og kaso.
Samtang sigun ni Gealon nga ang tabang nga gihatag sa nasudnong kagamhanan sa Dakbayan sa Sugbo sobra na kaayo ug gihangop ni Labella ang pag-abot sa kadagkuan sa nasudnong kagamhanan aron motabang sa problema nga gisagubang sa dakbayan.
Kun malugwayan pa ang enhanced community quarantine sa dakbayan, si Gealon niingon nga wala’y angayan kabalak-an tungod kay ang siyudad inabagan sa Sangguniang Panlungsod ni-aprubar na sa supplemental budget nga balor sa P500 milyones alang sa COVID-19 response. /GMR (BANATNEWS)
- Latest
