53 ka sugarol sikop sa tigbakayan

CEBU, Philippines — Wala nakaugpo ang 53 ka sugarol dihang kalit lang nga gilibutan sa kapolisan ang tigbakayan sa hilit nga bahin sa Sitio EZ, Kal-anan, Lungsod sa Tabogon.

Si Police Staff Sergeant Ronnie Alvio sa Tabogon Police Station niingon nga ang mga dinakpan ilang gipahiluna sa usa ka lugar nga ubos sa higpit nilang pagbantay.

Gikatakda nga ilang pasakaan og kaso sa kalapasan sa Presidential Decree 1602 o illegal gambling karong adlawa.

Matud ni Alvio nga nakadawat na sila og mga taho gikan sa pipila ka nagpakabanang molupyo sa maong dapit labot sa gipasiugdahang tigbakay sa grupo sa mga sugarol og manok igtatari sa maong dapit matag adlaw nga Sabado.

Kini ang hinungdan nga ilang gihimo ang joint operation sa Tabogon Police Station ug mga sakop sa 1st Police Mobile Force Company nga gipangulohan ni Police Lieutenant Randy Korret hinungdan sa pagkasikop sa mga sugarol ug nasakmit ang 17 ka manok hiniktan ug ang napulo niini pulos na gitauran og buwang.

Si Korret niingon nga gibutang pa sa maong lugar ang tulda nga nagdala sa pangalan sa Cebu Provincial Government nga maoy gigamit isip ilang kapasilongan sa nagtapok nga mga sugarol.

Gihimo ang operasyon sanglit adunay dakung posibilidad nga may nalambigit niini nga kawani sa kagamhanan nga maoy nagbutang og tulda sa maong lugar.

Nunot niini gipaneguro ni Korret nga ang kapolisan dili gyud mohunong sa mga sugarol nga mosupak sa mga lagda nga gipatuman sa kagamhanan nga nagdili sa pagtapok tungod sa nagpadayon nga hulga sa coronavirus disease 2019 samtang ang Lalawigan sa Sugbo gipaubos sa general community quarantine. /GMR (BANATNEWS)