Motocross sa Consolacion gipahunong

CEBU, Philippines — Gipahunong sa mga awtoridad ang usa ka motocross activity sa Pulpogan, Lungsod sa Consolacion kagahapon sa buntag.

Matud ni Police Major Verniño Noserale, hepe Consolacion Police Station, nga alas 11:45 sa buntag ilang nadawat ang impormasyon.

Sa pagresponde sa kapolisan, gimanduan dayon nila ang mga partisipante ug mga tawo nga ihunong ang maong kalihukan ug mamauli.

"Ato na pud gikuha ilang mga names, gi-document nato in case na mousab sila we can file appropriate charges sa ilaha at the same time if mousab sila, they will be subjected for arrest na," matud ni Noserale.

Gidugang ni Noserale nga sila usab naglikay sa posibilidad nga ang kalihukan mahimong makakuha og atensyon sa mga tawo nga manan-aw.

Kini isip usa ka pagpugong usab sa posible nga kalapasan sa lagda sa mass gathering ilawom sa mga protocol ubos sa general community quarantine (GCQ) sa Lalawigan sa Sugbo.

Sa pagkutlo sa pamahayag sa mga partisipante, si Noserale nagkanayon nga sila adunay lain nga interpretasyon sa mga protocol sa GCQ diin sila nagtuo nga gitugutan ang kalihukan sa motor cross.

"Naa lang silay mga interpretation nga allowed sila, just like tennis and golf but nakalimtan man gud nila ang oras, naa man gud tay mga specific hours na allowed ang non-contact sports," dugang niya.

Matud ni Noserale nga nakita nila nga kadaghanan sa mga partisipante ug manana-aw wala magsul-ob og mga masks nga paglapas usab sa mga protocol sa GCQ.

Namatikdan usab nga adunay usa ka sakop sa force multiplier apil sa kalihukan.  Hinoon walay gipangdakop tungod kay nituman man ang katawhan sa pagpahunong sa kalihukan.

Hangyo ni Noserale sa publiko nga mokooperar sa mga protocol sa GCQ tungod kay ang pipila ka pwersa sa kapolisan sa Consolacion ang gi-isolate. /GMR (BANATNEWS)