Bag-ong investment scheme gipanid-an sa kapolisan
CEBU, Philippines — Giawhag sa Criminal Investigation and Detection Group CIDG- 7 ang publiko nga modangop sa ilang buhatan sa kadudahan nga mga investment scheme.
Kini human gikatahung dunay bag-ong investment scheme nga mitumaw sa Probinsya sa Sugbo nga susama sa pamaagi sa pagpa-invest sa Organico.
Matud ni CIDG7 Deputy Regional Chief Police Major Roland Allan Tolosa nga nakadawat sila ug report kalabot sa giingong pagpangilad diha sa habagatang bahin sa Probinsya sa Sugbo.
Segun sa tahu dunay mga tawo nga moagni sa pag invest kun paghatag ug dakung kwarta alang sa negosyo nga pagbaligya ug itlog nga matud pa gipasalig nga kita niini moabot ug 50 ngadto sa 70 porsyento..
Nasayran nga aduna nay pipila ka mga nabiktima nga mga maestro, konsehal ug uban pa tungod sa pasalig nga dakong kwarta nga maballik sa mga investors. Gikahibung sa mga biktima nga wa na mopatim-aw ang giila sa pangan nga Rosa Ubay nga taga Barangay Guadalupe Dakbayan sa Sugbo human makuha ang mokabat sa 4.5 milyones pesos..
Subay niini giawhag sa CIDG-7 ang mga biktima sa pagsang-at ug pormal nga reklamo batok sa maong mangingilad. /MEL (BANATNEWS)
- Latest