Naghatud og minatay gipangdakop

CEBU, Philippines — Kapin sa 30 ka tawo nga naghatud og lubong sa ilang silingan ang gidakop sa kapolisan sa Dakbayan sa Talisay kagahapon sa buntag sa kalapasan sa social distancing.

Si Police Major Gerard Ace Pelare, hepe sa Talisay City Police Station, nagkanayon nga ubos sa lagda sa quarantine protocol, dili molapas sa 10 ka tawo ang gitugutan nga makahatud og lubong.

Matud ni Pelare nga ang mga nakalapas pasakaan og kaso ug ang korte na ang mopahamtang sa multa.

Ang mga dinakpan kasamtangang gitanggong sa detention facility sa Cansojong gym.

Hinoon nalubong ra ang patay ug dili mominus 10 lang ang gitugutan nga makatambong.

Sa laing bahin moabot sa 48 ka tawo ang nangadakpan sa kapolisan sa kalapasan gihapon sa quarantine protocols sa Lungsod sa Minglanilla.

Ang kalapasan naglakip sa “no backriding policy” ug wala pagsuot og face mask.

Sugod kagahapon gihingusgan ang pagdakop sa mga makalapas sa quarantine protocols ug walay pilion nga naglakip sa backriding sa motorsiklo o habal-habal, walay face mask, pagtapok-tapok nga kalapasan sa social distancing, mag-jogging sa kadalanan, magduwa og basketball sa gawas ug sa ubang susama nga kalihukan, sugal sama sa tari ug uban pa ug paggawas-gawas nga walay importanteng katuyoan gawas sa mga nagtrabaho.

Ang maong lakang gihimo human sa tigum sa mga konsehal ug kapitan sa mga barangay sa Lungsod sa Minglanilla uban ang hepe sa kapolisan sa lungsod tumong sa pagpugong nga mokatap ang coronavirus disease.

“Unya nasayud ba mo ug pila na ka positive sa atong lungsod? Gusto ba mo nga moabot sa punto nga mag-hard lockdown ta tungod sa paghagit ninyo kanunay sa gobiyerno nga mao untay angay sa tanan,” matud ni Police Major William Homoc, hepe sa Minglanilla Police Station.

Kapin 1,000 nakalapas

Samtang moabot na sa 1,171 ka tawo ang natala nga nasikop sa Cebu Provincial Police Office (CPPO) sukad sa kapin usa ka buwan nga general community quarantine sa Probinsiya sa Sugbo.

Kini ang gibutyag ni CPPO Director Rhoderick Mariano diin sagad sa nadakapan kalapasan sa social distancing, pagpaangkas sa motorsiklo ug dili pagsul-ob og facemask.

Bisan sa pagtugot ni Gob. Gwendolyn Garcia nga mahimong makaligo og dagat gikan sa alas 8 sa buntag hangtud ala una hapon, 30 ka tawo ang gidakop sa Lungsod sa Dumanjug atol sa  kapistahan ni San Juan Bautista niadtong Miyerkules.

Matud sa hepe sa Dumanjug Police Station, Police Major Ardy Cabagnot, nga tungod kini sa kalapasan sa social distancing ug mass gathering.

Ang mga nadakpan dunay gipamulta samtang dunay uban gipahimo og community service sama sa pagtabang sa pag-andam sa ayuda ug uban pa.

Sa kinatibuk-an gihulagway ni Mariano nga hapsay ug malinawon ang Probinsiya sa Sugbo sa gipatuman nga GCQ. Le Phyllis F. Antojado, Gabriel C. Bonjoc, Sheriza Mae R. Uy/GMR (BANATNEWS)