Road closures nakamugna og huot sa trapiko sa dakbayan

CEBU, Philippines — Nagkaguliyang ang mga sakyanan atol sa unang adlaw sa pagsira sa pipila ka kadalanan sa Dakbayan sa Sugbo kagahapon.

Ang mga motorista nagkasalimuang kung asa moagi hinungdan nga nakasinati gyud og paghuot ang mga boundaries.

Gisirado ang 11 ka eskina ilabi na habig sa Serging Osmeña Avenue sa North Reclamation Area nga molungtad hangtud sa Huny 30. Ang mga karsada nga gisirhan naglakip sa Kaoshiung Street, Juan Luna Avenue, 3rd Avenue, General Maxilom Avenue, Commerce St., T. Padilla Extension, V. Sotto Street, Palma Street, Sergio Osmena Avenue, Maritima ug N. Bacalso Avenue. Si Mayor Edgardo Labella nipasabot nga ang road closure gitumong aron mas maayo ang pagkadumala sa dagan sa sakyanan sulod sa siyudad samtang ubos pa sa enhanced community quarantine. Samtang nakig-alayon ang kagamhanan sa Dakbayan sa Talisay sa Siyudad sa Sugbo aron maablihan pagbalik ang Natalio Bacalso Avenue habig sa Barangay Bulacao.

Si Talisay City Mayor Gerald Anthony “Samsam” Gullas Jr. niklaro nga ang Dakbayan sa Sugbo maoy nisira sa ilang border sa duha ka habig.

Gani ang kamanduan ni Gullas mao nga duha ka entrance ug duha ka exit ang ilang sundon samtang naa na sa general community quarantine ang dakbayan.

Sa niaging semana nasira sab ang maong karsada apan nahangyo kini ug paingon sa habagatan lang ang gibuksan. Gabriel C. Bonjoc/GMR (BANATNEWS)