400 ka tawo wala motuman sa protocol sikop
CEBU, Philippines — Nikabat ngadto sa 400 ka tawo ang nadakpan sulod sa duha ka adlaw nga operasyon sa kapolisan batok sa mga nakalapas sa gipatuman nga protocol paglikay sa covid-19.
Si Mayor Junard Ahong Chan nagkanayon nga ang maong mga tawo nga nadakpan wala manumbaling sa pagtuman sa iyang giluwatan nga Executive Order No. 2020-048H.
“Puno na ang atong mga hospital sa mga symptomatic patients. Mura’g mapuno na pod ang atong mga detention cells ani tungod sa mga violators”, matud ni Chan diha sa iyang post sa facebook niadtong Sabado.
Ang kapolisan sa Lapu-Lapu-Lapu City Police Office (LLCPO) ug ang City Traffic Management System (CTMS) nagpahigayon sa pagpatrolya sa palibot sa dakbayan diin sulod lang sa Biyernes ug Sabado nikabat ngadto sa 372 ka tawo nga nakahimo og kalapasan sa gipatuman nga health protocol sa kagamhanan.
“Doble na ang pagpangusog sa atong mga kapolisan nga ipatuman ang mga lagda sa atong Executive Order No. 2020-048-H”, matud ni Chan.
Si Chan nagkanayon nga kong ang katawhan dili motuman sa mga lakang nga gipatuman batok sa covid-19 ang kagamhanan sa siyudad dili kini magmadaogon sa pagsanta sa maong makamatay nga sakit.
“Kooperasyon ug disiplina ang akong kanunay nga panawagan. Wala akoy pagkulang sa pagpahimangno kaniny. Dili ko kapuyon nga balik-balikon kini hangtud nga magmatngon ang tanan sa mga angayang buhaton para maluwas kitang tanan. Ato kining gibuhat para gihapon sa atong kaayohan”, matud ni Chan sa iyang post diha sa facebook. /BDB (BANATNEWS)
- Latest
