Talisay City maghigpit gihapon
CEBU, Philippines — Samtang nalipay si Mayor Gerald Anthony “Samsam” Gullas Jr. sa Siyudad sa Talisay nga gipaubos nalang sila sa general community quarantine gikan sa modified GCQ, gidasig niya ang mga Talisaynon nga mosunod gihapon sa mga protokol.
Giklaro niya nga ang pag GCQ sa siyudad wala magpasabot nga mahimo na nga magsuroy-suroy ang tanan. Matud niya, gipaningkamotan niyang mabutang sa GCQ ang siyudad dili para maglaruy-laroy ang mga tawo kondili ang pagbuhi og balik sa ekonomiya ug pagpabalik sa imahe sa siyudad.
“We showed the real data for Talisay and now we are now downgraded to GCQ. Pero please don’t take this as an excuse na pwede nata magsuroy-suroy for leisure,” si Gullas miingon.
Nagpasalamat siya ni Gobernador Gwendolyn Garcia sa tabang niini aron madungog ang iyang pag apelar.
Giangkon sa mayor nga padayon gyud ang pagsaka sa kaso sa COVID-19 sa Talisay mao nga bisan nag GCQ na, mas estrikto nilang bantayan ang mga tawong maglaag-laag lang.
Si Police Major Gerard Ace Pelare, pangu sa Talisay City Police Station mohangyo nga ipabilin ang gidugang nga polis aron daghan ang magbantay pagpatuman sa safety protocols. /IBM (BANATNEWS)
- Latest