Lima ka NPA patay
CEBU, Philippines — Lima ka gituohang sakop sa New People’s Army ang namatay sa engkwentro tali sa kapolisan ug kasundalohan diha sa Sitio Talingting, Barangay Luyang lungsod sa Mabinay Negros Oriental.
Matud ni Police Regional Office 7 Director Police Brigadier General Albert Ferro nga usa ka joint-operation ang AFP ug PNP pag-serve sa warrant of arrest tungod sa kasong illegal possession of firearms batok kang Isaias Rabalista Jr. gikan sa sala ni Judge Rosario Carriaga sa Regional Trial Court (RTC) Branch 75 sa Dakbayan sa Bais Negros Oriental.
Si 11th Infantry Battalion Commanding Officer Army Lieutenant Colonel Ramir Redosendo mitug-an sab nga samtang naglakaw paingon sa duha ka panimalay ang tropa sa gobiyerno kalit silang gipaulanan og bala sa grupo ni Rabalista.
Pangangkon pa ni Redosendo, 30 minutos ang engkwentro ug niresulta sa pagkamatay sa lima. Apan bugtong si Rabalista pa maoy ilang nailhan.
Si Redosendo miingon nga dako kaayo og papel ang lokal nga kagamhanan sa Mabinay ug sa mga molupyo nga nitabang batok sa NPA sa ilang dapit.
“I would like to commend the residents of Barangay Luyang for reporting the presence of armed men in the area, and I urge the people of Negros Oriental to continue reporting the presence of this NPA terrorist in their community,” matud pa ni Redosendo.
Matud ni Ferro nga si Rabalista apil sa pagpatay sa upat ka polis sa lungsod sa Ayungon, Negros Oriental niadtong milabay nga tuig. Matud ni Ferro nakadawat sila og report nga ang grupo ni Rabalista kabahin sa grupong nanghasi sa distribusyon sa Social Amelioration Program sa mga bukirang barangay.
Nakuha sa maong operasyon ang nagkalain-laing high powered firearms sama sa duha ka M16 Armalites rifles, usa ka AK-47 rifle, mga bala, cellphone ug subersibong dokumento. /IBM (BANATNEWS)
- Latest
