Garcia: Diyotay lang ang estudyante nga dunay access sa internet
CEBU, Philippines — Si Gobernador Gwendolyn Garcia sa Probinsiya sa Sugbo nibutyag nga anaa lang sa 17.6 porsyento sa kapin 500 mil nga kinatibuk-ang populasyon sa mga tinun-an sa probinsya ang adunay access sa internet o adunay gadget nga magamit kon mag-online class.
Atol sa pakigtagbo ni Garcia sa mga opisyal sa Department of Education (DepEd) Cebu Province Division ug schools division superintendent sa probinsiya nasuta nga dili tanang mga tinun-an maka-access sa internet ug lisod ang pagpatuman sa online class bisan og ideal unta kini nga alternatibo nga pamaagi sa pagklase tungod kay ubos lang ang porsyento sa maka-access og internet.
"Which leaves 82 percent nga walay access. Ideal unta ang online pero ang sa uban sad like Bogo City, 20% ra ang dunay access", matud ni Garcia. Sa Cebu Province giingong 103,000 lang ka tinun-an sa 587, 900 nga populasyon ang adunay internet access.
Kahinumduman nga ang DepEd nipa-fill-up kini og survey form alang sa mga estudyante pagsuta kon pipila kanila ang adunay gadget o maka-access sa internet.
Si Garcia nitug-an usab nga moabot sa P2 bilyones ang magasto sa usa ka tuig kon magpaprinta og workbooks kon ugaling ipatuman ang modular type sa klase.
"Tagaan og ilang worksheet o workbook, usa kada subject, one every week. So if walo na ka subjects, walo na ka workbooks in four weeks sa usa ka bulan 32 na na ka workbooks.
Ang pag-reproduce pa lang ana daan grabe na kaayog cost. Nikwenta sila at 120 per workbook it will probably cost the Province P2 billion for 587, 000 ka students in one year" matod ni Garcia.
Gitan-aw sa DepEd karon nga iagi sa purok system apan hagit gihapon kini hilabina kon naa gihapon sa guidelines sa community quarantine nga nagdili sa menor de edad nga mogawas ug gidili ang face to face interaction. /BDB (BANATNEWS)
- Latest
