Bike Lanes sa Cebu City gitinguha ni Labella

CEBU, Philippines — Tungod sa peligro sa disgrasya karong nagkadaghan na ang nigamit og bisekleta sa kadalanan sa Cebu City, si Mayor Edgardo Labella nipahibalo nga pabutangan og mga bicycle lanes ang kadalanan sa siyudad.

Sumala pang Labella dunay ad hoc nga grupong gilangkuban sa mga “bike enthusiasts” ug mga opisyal ang umolon aron tun-an kung asa nga mga lugar ug mga kadalanan nga pabutangan og bike lanes.

“I will be organizing an adhoc group to make a study on the areas where we can place designated bike lanes. Under the new normal, I think bike lanes would be helpful especially that bicycles have become a usual mode of transportation, besides it is more in attuned with environmental concerns,”matud ni Labella.

Ang ad hoc committee apilan ni Alma Barandog-Casimero, hepe sa Cebu City Transportation Office (CCTO), kanhi na konsehal nga si Gerardo Carillo, ug si Konsehal Eugenio Gabuya Jr.

Si Labella gikatakdang mag-isyu sa usa ka Executive Order bahin niini.

Niadtong Hunyo 6, gipahunong ni Labella ang mandatory registration alang sa mga bisikleta ug ang pagdili sa ilang paggamit sa kadalanan sa Cebu City tungod kay dugang gastos lang kini sa katawhan.

Wala na sab pangitaan og driver’s identification card (ID) ang mga drayber sa public utility vehicles (PUV) tungod gihapon sa maong rason. Hinuon kadtong gusto gyud nga iparehistro ang ilang bisekleta, si Labella miingon nga wala kini bayad. /IBM (BANATNEWS)