Lab-asero gipatay sa karibal
CEBU, Philippines — Patay ang usa ka 49-anyos nga labasero human gidunggab sa makadaghan nga higayon sa giingong kanhi kapuyo sa kapuyo karon sa biktima diha sa Skyview Hills, sa Barangay Apas niadtong Sabado sa kaadlawon.
Ang biktima mao si Edward Amaquin, 49, samtang ang giingong suspetsado mao si Ismael Manila.
Matud pa ni Police Master Sergeant Antonio Din, Investigator sa Mabolo Police Station base sa nahipos nilang mga impormasyon, ang kapuyo karon sa biktima kanhi kapuyo sa suspek. Nagtuo silang mao kini ang motibo sa maong pagpatay.
Sumala pa ni Din, ang biktima ug ang kinugos niini anaa sulod sa multicab nga gi-parking dili layo sa balay ni Amaquin kay padulong unta sila sa Pasil aron mangompra og isda nga ibaligya.
Apan kalit lang nga niabot si Manila nga nagsakay og motor dayon babag sa multicab sa biktima.
Gitug-an ni Din, dali nga niibot ang suspek og kutsilyo dayon dunggab ngadto sa biktima sa makadaghang higayon.
Ang kauban sa biktima dali nga nigawas ug nangayo og tabang sa mga silingan apan sa pagresponde sa mga tawo wala nay kinabuhi si Amaquin.
Nakasibat sab dayon ang suspetsado kinsa padayon pa karong gipangita sa kapolisan. /IBM (BANATNEWS)
- Latest
