Riding-in-tandem nihasi sa Lapu-Lapu

CEBU, Philippines — Bisan gidili ang pag-angkas sa motorsiklo apan ang sunod-sunod nga pagpamusil sa Dakbayan sa Lapu-Lapu binuhatan sa riding-in-tandem.

Sayo kagahapon sa buntag, patay ang labasero og isda nga sakay sa biseklita nga gipusil sa riding-in-tandem sa Sitio Ylaya, Barangay Marigondon.

Ang kapolisan sa Presinto 4 sa Lapu-Lapu City Police Office (LLCPO) padayon pa nga niila sa biktima sa pagkutlo sa balita.

Matud pa nga ang wala mailhi nga mga lalaki nga nagsakay og motorsiklo ang kalit lang nitumaw sa maong dapit dayun pusil sa biktima.

Niadtong Martes sa gabii, patay sab ang 18-anyos nga lalaki human kini gipusil samtang naglakaw sa may Sitio Casio, Barangay Bankal sa maong dakbayan.

Ang biktima giila nga si Leo Duhig, residente sa maong lugar.

Matud ni Police Master Sergeant Alain Bandulon sa LLCPO Station 5 nga giingong duha ka lalaki nga sakay og motorsiklo ang nipusil niini kang Duhig sa duha ka higayon.

Ang insidente mao ang ikaduha nga higayon sa maong lugar, human gipusil sab kadtong 34-anyos nga job order employee sa Lapu-Lapu City Hall sa mga nagsakay gihapon og motorsiklo sa Sitio Coles,     Bankal.

Ang pagpamusil maoy ikalima nga nahitabo sa Dakbayan sa Lapu-Lapu nga naglambigit sa riding-in-tandem sukad sa pagtakli na ngadto sa general community quarantine (GCQ) gikan sa enhanced community quarantine (ECQ). Rowena D. Capistrano/GMR (BANATNEWS)