32 sakyanan nakalapas sa number coding

CEBU, Philippines — Moabot sa 32 ka mga sakyanan ang naisyuhan og citation tickets sa Cebu City Transportation Office atol sa unang adlaw sa General Community Quarantine sa Dakbayan sa Sugbo niadtong adlaw nga Lunes.

Si John Paul Amores, public information officer sa communications and electronics sa CCTO nga nahinabi sa Banat News nga ang mga naisyuhan sa tickets mao kadtong nakalapas sa number coding scheme.

Matud pa ni Amores, bisan o GCQ na ang dakbayan nagpadayon gihapon ang coding scheme base sa giluwatan nga executive order ni Mayor Edgardo Labella.

Sumala pa ni Amores, gawas sa naisyuhan aduna usab 17 ka mga motorsiklo, usa ka 4-wheel, tulo ka e-bikes ug tulo ka trisikol ang na-impound tungod sa expired ang rehistro sukad pa sa nilabay nga tuig ug wala usab silay lisensya.

Awhag sa CCTO sa mga biyahidor nga padayon gihapon nga motuman sa coding scheme ug mosunod sa lagda sa trapiko.

Giawhag usab ni Amores, ang mga nanag-iya sa na impound nga sakyanan sa paglukat niini aron dili sila makabayad sa storage fee.  /IBM (BANATNEWS)