Electrician, kanhi sikyu, mananagat gipamusil patay

CEBU, Philippines — Tulo ang patay sa managlahing pagpamusil nga nahitabo sa Dakbayan sa Lapu-Lapu. Naglakip sa mga biktima mao ang job order nga kawani sa kagamhanan sa dakbayan nga nadestino sa City Engineering Department sa Street Lighting Division.

Si Police Master Sergeant Jimmy Singson sa Presinto 2 sa Lapu-Lapu City Police Office (LLCPO), niila sa biktima nga si Ryan Daño, 34, taga Barangay Agus.

Matud ni Singson nga nagtrabaho si Daño sa nadaut nga suga sa poste sa Sitio Kauswagan sa Barangay Bankal sa maong dakbayan ala una pasado sa hapon niadtong Lunes dihang wala hiilhing duha ka lalaki nga nagsakay og motorsiklo ang kalit lang namusil sa makadagahang higayon.

Dali usab nga nisibat ang mga mamumuno ug ang biktima gidala unta sa Mactan Doctor’s Hospital apan gideklarar kini nga dead on arrival.

Samtang alas 7 pasado sa gabii sa mao gihapong adlaw laing pagpamusil nahitabo sa Tigkahon, Barangay Bankal diin ang biktima mao ang kanhi security guard nga giila nga si Edwin Paderanga, 36, nga nagpuyo sa maong dapit.

Si Police Senior Master Sergeant Lydo Pinus sa Presinto 2 sa LLCPO niingon nga nagluto sa ilang panihapon sa kusina ang biktima dihang nitumaw ang wala hiilhing lalaki ug kalit lang namusil dayong sibat pahilayo sa maong dapit.

Nahitabo usab ang laing pagpamusil sa Barangay Punta Engaño diin ang biktima mao ang mananagat nga si Angelo Dahil, 25, nga nagpuyo sa maong dapit.

Si Pinus niingon nga nagbarug lang ang biktima sa daplin sa karsada sa maong dapit dihang nahitabo ang kalit nga pagpamusil.

Matud ni Pinus nga mohimo pa sila og dugang pakisusi sa maong mga pagpamusil. /GMR (BANATNEWS)