Liquor ban sa Mandaue gilibkas na

CEBU, Philippines — Gilibkas na ang liquor ban sa Dakbayan sa Mandaue nunot usab sa pagtakli na gikan sa Enhance Community Quarantine ngadto na sa General Community Quarantine (GCQ) sugod kagahapon. Nunot niini gitugot na ang pagbaligya sa mga ilimnong makahubog, pagbukas sa mga pabrika o mga planta alang sa pagbalik na sa ilang operasyon, pag-deliver sa ilang produkto sa nagkadaiyang lugar apan higpit gihapon nga gidili ang pag-inom sa mga publikong dapit sa dakbayan.

Dugang naghinayhinay na sa pagbukas sa ilang operasyon sa Dakbayan sa Mandaue mao ang nagkadaiyang industriya ug financial services, legal ug ingon man ang mga accounting ug auditing services; professional, scientific, technical ug uban pa nga mga non-leisure services, wholesale ug mga retail nga mga establisemento.

Hinuon gawas nga giawhag sa kagamhanan sa dakbayan ang mga tagdumala sa pagkuha og special permit, higpit usab nga gipahimangno sa pagpatuman sa social distancing pinaagi sa pagpasulod lang sa 50 posyento nga gidaghanon sa ilang mga trabahante, pagsul-ob og face mask ug ang pagpanghunaw kanunay sa kamot gamit ang tubig ug sabon ug ang paggamit sa alcohol. /GMR (BANATNEWS)