Unang adlaw sa GCQ, duha ka sunog niulbo
CEBU, Philippines — Duha ka sunog ang nisugat sa unang adlaw sa pagpaubos sa General Community Quarantine sa Dakbayan sa Sugbo kagahapon.
Ang unang sunog nahitabo sa may Lomboy Street, Banawa, Barangay Guadalupe diin nadawat sa kabomberohan ang maong sunog alas 6:22 sa buntag.
Ang sunog nagsugod sa panimalay ni Marilyn Dela Concepcion nga gipuy-an ni Edzel Caballero apan pag-abot sa kabomberohan hingpit na kini nga napawong.
Gibana-bana nga anaa lang sa P1,000 ang danyos sa maong sunog nga niangol nila ni Caballero, 33-anyos, kinsa nakaangkon og second degree burn sa iyang tuong kamot ug Aljohn Ancajas, 27-anyos, kinsa nakaangkon sab og first degree burn sa iyang likod.
Ikaduhang sunog nahitabo sa may Holy Family Road, Nivel Hills, Barangay Lahug alas 7:06 sa buntag.
Ang sunog nagsugod sa giingong panimalay nila ni Alejandro ug Evangeline Tolivas.
Ang maong sunog giisa ra first alarm diin gibana-bana nga moabot sa P5,000 ang danyos.
Gisubay sa kabomberohan ang hinungdan sa maong duha ka sunog. /GMR (BANATNEWS)
- Latest
