Mga armas, eksplosibo gipangtahan

CEBU, Philippines — Nikabat ngadto sa 20 ka armas ang gitahan ngadto sa Cebu City Police Office (CCPO) gikan sa mga bukirang barangay sa Dakbayan sa Sugbo.

Subay kini sa Oplan Dysprosium sa City Mobile Force Company (CMFC) pinagulohan ni Police Lieutenant Colonel Randy Korret.

Matud ni Korret nga nilusad  sila og lima ka adlaw nga operasyon ngadto sa Barangay Bonbon, Buot, Sin-Sin, Sudlon 1, Sudlon 2, Tabunan, Pung-ol, Babag, Pamutan, Toong, Sapangdaku ug Kalunasan.

Ug ang mao nilang operasyon subay kini sa kampaniya batok sa mga loose firearms sa Dakbayan sa Sugbo.

Gibutyag usab niya nga sagad sa mga armas nga gipangtahan mga armas kini  panahon pa sa World War 1 ug World War 2.

Gipasabot ni Korret nga ang mga tawo sa bukid kasagaran adunay mga armas isip panaggang sa mga armadong grupo sa unang panahon.

Apan tungod kay kanunay na nga makit-an ang kapolisan sa bukid ug nawala na ang kahadlok sa maong mga residente sa mga armadong grupo nakadesisyon kini nga itahan ngadto sa kapolisan ang ilang gihuptang mga armas.

Ang nahisgutang 20 ka armas gilangkuban kini sa  upat ka caliber .22 rifle; upat ka 12 gauge improvised shotgun; usa ka caliber .45 nga pistola; usa ka caliber .357 revolver; usa ka caliber .30 revolver; ug upat ka caliber.38 revolver.

Gawas sa mga armas tulo ka explosive devices sama sa duha ka rifle grenade ug usa ka hand grenade ang gitahan.

Ang kapolisan padayon kining nanawagan sa mga naghupot pa og armas nga isurender na kini.  /BDB (BANATNEWS)