Dugang bus padaganon sa Mandaue karong Lunes
CEBU, Philippines — Ang kagamhanan sa Dakbayan sa Mandaue mopadagan og dugang pa nga bus sa nagkalainlaing rota karong Lunes, Hulyo 1, 2020 alang sa pagpasakay sa mga pasahero nga mobalik na sa ilang trabaho nunot usab sa pagtakli na ngadto sa general community quarantine (GCQ) gikan sa enhanced community quarantine (ECQ) sulod sa duha ka bulan nga nakalabay.
Sa advisory nga gi- post sa facebook page sa City Public Information Office sa Mandaue nasayran nga ang 120 ka bus ang padaganon sa kagamhanan nga maoy masakyan sa mga pasahero diha sa 12 ka nagkalinlain nga rota.
Ang maong mga bus nga pasaheroan adto kini molabay sa national highway ug uban pa nga dagkong dalan sa dakbayan sanglit ang mga traysikol gitugotan lamang sa pagpamasahero diha sa mga secondary road ug mga dalan sa kabarangayan.
Nunot niini, gatusan ka drayber sa traysikol ang nihangop sa ilang pagbalik na sa pagpamasahero sugod karong Lunes.
Si Konsehal Jimmy Lumapas, chairman sa committee on transportation utilities communication and market sa iyang gipangamahanan nga resolusyon ang nipasabot sa gilatid nga mga giya alang sa mga traysikol subay usab sa giaprobahan nga mga lagda sa City Tricycle Regulatory Board (CTRB) sa maong dakbyan sa pagpamashero.
Matud ni Lumapas nga nalakip niini ang pagkuha og special permit, pagbutang og salipod nga plastik sa side card sa ilang traysikol, pagsubay sa mga secondary road o mga barangay road sa dakbayan.
Dugang niini mao ang pagsul-ob sa drayber og face mask ug usa lang ka pasahero ang pasakyon ug P25 na usab ang plete sa traysikol. /BDB (BANATNEWS)
- Latest