Talisay adunay duha ka bag-ong kaso sa COVID-19

CEBU, Philippines — Duha nasab ka mga kaso sa COVID-19 ang nadugang sa talaan sa Dakbayan sa Talisay kagahapong adlawa sumala pa ni Mayor Gerald Anthony “Samsam” Gullas Jr. pinaagi sa iyang Facebook post. Ang duha ka tawo nga natakbuyan sa virus pulos gipang swab sa Vicente Sotto Memorial Medical Center.

Ang PT29 usa ka 66 anyos nga taga Barangay Tanke nga na-admit sa maong tambalanan niadtong Mayo 26. Samtang ang PT30 usa ka 25 anyos nga taga Barangay Dumlog.

Usa siya ka trabahante sa usa ka hospital sa Siyudad sa Sugbo kinsa adunay gipamati sa iyang kalawasan.

Ang mga pamilya ug mga tawong uwahi nilang nakauban gibutang na sa pasilidad nga sila lang aron dili na makatakod kung pananglit sila nangatakdan sab sa maong sakit.

Sa pikas bahin, ang Mandaue City dunay upat ka bag-ong kompirmadong COVID-19 cases subay sa natala kagahapong adlawa Mayo 29, 2020. Usa sa mga pasyente mao ang 19 anyos nga babayeng taga Pacencia Compound, Tipolo, Mandaue City; samtang ang usa 65 anyos nga lalaki nga nagpuyo gihapon sa maong address; ang laing duha mga inmates sa Mandaue City Jail.

Sumala pa nga ang duha sa upat direktang mga nakauban sa nahauna nang pasyenteng positibo sab sa maong virus.

Ang mga sakop sa DRRMO nagpahigayon na og decontamination operation sa dapit diin sila magpuyo samtang gihimo na ang contact tracing.

Tungod niini, ang Mandaue City aduna nay kinatibuk-ang 242 nga kompirmadong kaso sa maong sakit , dose na ang naayo ug upat ang nangamatay. Ang Mandaue City  Jail maoy dunay pinakadaghan og kaso nga 194 ka inmates, usa ka  BJMP Personnel, samtang 31 ang active cases sa komunidad. IBM (BANATNEWS)