Labella miapelar nga mag GCQ ang siyudad

CEBU, Philippines — Si Cebu City Mayor Edgardo Labella nipadala og suwat kang Department of Interior and Local Government (DILG)-7 Regional Director Leocadio Trovela kinsa mao sab ang Chairperson sa Regional Inter-Agency Task Force for the Management of Emerging Infectious Disease (RIATF-MEID) aron moapelar nga ipaubos ngadto sa General Community Quarantine (GCQ) inay nga Modified Enhanced Community Quarantine ang siyudad sugod Hunyo 1 hangtod sa Hunyo 15, 2020.

Subay sa Resolution No. 40 nga giluwatan sa Inter-Agency Task Force for the Management of Emerging Infectious Diseases (IATF-MEID) ning bag-ohay lang, ang Cebu City nga giisip nga high-risk area sa COVID-19 ipaubos sa MECQ sugod Hunyo 1 hangtud Hunyo 15.

Apan si Labella miapelar nga GCQ lang kay sa iyang tan-aw andam na ang siyudad para niini.

Gihimo niyang basehanan ang gidaghanon sa mga nataptan ug sa nangamatay. Base sa talaan Mayo 28, ang siyudad duna nay 2,055 ka kaso sa COVID-19 apan kun tan-awon og maayo 25 lang gihapon ang gidaghanon ang nangamatay.

Nagkadaghan sab ang gidaghanon sa mga nangaayo, kagahapong adlawa miabot na kini og 471.

Matud sa mayor, dako kaayo ang indikasyon nga magpadayon ang pagkubos sa gidaghanon sa mga natakboyan sa siyudad.

"With the general community quarantine, ato sang matagaan og kapanginabuhian ang ato sad mga kaigsuonan,"matud sa mayor.

Kun ugaling matugotan ang iyang apelar, gihangyo sa mayor ang katawhan nga magbaton og disiplina sa kaugalingon.

Hinuon bisan pa og mag GCQ ang siyudad mahimong i- lockdown ang mga lugar nga dunay daghang kaso sa COVID-19. Samtang wala pay tubag sa iyang apelar  sundon sa siyudad ang MECQ.

Nunot niini, si Atty. Rey Gealon, tigpamaba ni Labella miingon nga andam na ang guidelines para MECQ, apan dili mandatory ang pagpaubos sa mga empleyado sa testing ug pagbuot na kini sa mga kompanya alang sa kasigurohan sa ilang panglawas.

Sa MECQ kasagaran sa mga negosyo makabalik na og abli apan bawal gihapon ang mga massage parlor, salon, barber shop, sauna, spa, gym ug fitness centers ug mga negosyong imposible ang social distancing.

Kadtong makapangabli na, katunga ra sa ilang mga trabahane ang patambungon kadtong uban mag work from home lang una.

Higpit gihapon ang social distancing, magsul-ob og facemask ug uban pa nga mga protocols ilabi na sa mga high-risk occupations, industries ug ang mga lugar.

Wala gihapoy mga pasaheroan nga makadagan gawas lang sa giandam sa LTFRB nga 200 ka buses nga magbiyahe dinhi sa dakbayan sa Sugbo ingon man sa mga silingang siyudad.

Kadtong taga probinsiya makasulod na sa siyudad mopakita lang og Certificate of Employment ug company ID ug ang mga nagbantay sa border control dunay lista kun unsang mga trabaho ug negosyo ang gipang-ablihan.

Sa pikas bahin, si PRO7 Director Police Brigadier General Albert Ferro miingon nga andam na silang motabang pagpatuman sa “new normal” subay sa padayong pakigbatok sa COVID19.

"We don't want to have a second outbreak, a second wave, pagdili ta magsunod in the strategy on how we can lessen or control the spread of disease, ato man makita ‘tong sa other countries na talagang grabe ang mortalities(nangamatay), better na gradual atong transitioning," dugang pa ni Ferro.

Samtang gipahibalo sa Cebu City Police Office nga sa MECQ gitugotan na ang mga outdoor activities sama sa jogging, ug physical exercises. Sheriza Mae Uy/IBM (BANATNEWS)