Garcia niluwat og EO alang sa protocols sa stranded ug OFW
CEBU, Philippines — Si Gobernador Gwendolyn Garcia niluwat kini og executive order alang sa mga rekisitos nga tumanon sa mga na-stranded ngadto sa laing lugar ug buot na nga mopauli sa ilang mga lungsod o dakbayan sa Probinsiya sa Sugbo.
Lakip sa mga rekisitos mao ang negatibo nga resulta sa rapid test o swab test ug kon wala mamahimong medical certificate gikan sa municipal o city health officer sa Local Government Unit (LGU) diin sila na-stranded.
Ang maong certification magpakita nga ang Locally Stranded Individual wala kini makahimamat og indibidwal nga suspected o kompirmado nga nataptan sa covid-19 ug nakahuman na kini sa 14-day nga quarantine sa lugar diin kini na-stranded.
Matud ni Garcia nga ang letter of acceptance pre-requisite kini sa pagkuha og travel authority nga iluwat sa IATF-Joint Task Force on Coronavirus Shield ug kong wala ang maong sulat gikan sa ulian nga LGU dili mahatagan og travel authority ang indibidwal nga na-stranded.
Ang LSI mamahimo kining tugotan nga makasulod sa LGU nga ulian kon kini kompirmado nga residente sa lugar ug adunay letter of confirmation gikan sa mayor.
Kinahanglan usab nga ang mga dokumento nga ipakita sa LSI walay bakak nga impormasyon ug kinahanglan mosunod usab kini sa health protocols nga gipatuman sa LGU nga ulian niini.
Samtang sa mga Overseas Filipino Workers (OFW), si Garcia niluwat kini og laing EO nga nagmenos sa quarantine period nga kinahanglang ipaubos ang usa ka OFW nga mo uli. Sa iyang EO No. 17-C, si Garcia nagkanayon nga ang usa ka OFW makasulod sa probinsiya kon aduna kini negative result sa PCR-test ug aduna kini certification gikan sa Department of Health nga nagpamatuod nga nakahuman kini og 14 ka adlaw nga kwarantina didto sa kaulohan.
Ang Overseas Workers Welfare Administration (OWWA) kinahanglang mo endorso kini ngadto sa Provincial Health Office sa listahan sa mga mouli nga OFW sa Probinsiya sa Sugbo alang sa maayo nga koordinasyon ngadto sa mga municipal o city health officer sa ulian nga LGU.
Inig abot sa Sugbo, ang OFW ikwarantina na lang kini og lima ka adlaw sa dili pa kini hingpit nga makauli sa ilang home LGU ug human niana kuhaon kini sa ulian niini nga LGU ug ipaubos sa local health protocols. /BDB (BANATNEWS)
- Latest