Flores: New normal dakong hagit sa mga bus operator

CEBU, Philippines — Ang new normal nga sitwasyon usa ka dakong hagit karon sa mga bus operator tungod kay pipila lang sa mga pasahero ang nisakay sa mga pasaheroang bus padulong sa nagkadaiyang destinasyon nga ubos na sa general community quarantine (GCQ).

Kini ang gitug-an ni Barili Vice Mayor Julito Flores ug presidente sa Cebu Provincial Bus and Mini Bus Operators Transport Cooperative (CPBMTC) nga nahinabi sa Banat News.

Matud ni Flores nga pipila pa lang karon ang nagdagang bus nga pasaheroan tungod kay menos pa man ang mga pasahero nga sumasakay bisan og ubos na ang probinsiya sa GCQ.

Gibutyag ni Flores nga aduna sila’y 16 ka units nga gipadagan karon diha sa pipila ka lugar sa habagatan nga bahin sa Probinsiya sa Sugbo.

Dugang ni Flores nga lisod pa kaayo karon sa mga operator ang pagpabiyahe sa mga bus tungod kay alkanse sila apan kinahanglan nila nga mobiyahe aron adunay public awareness ang mga sumasakay. /BDB (BANATNEWS)