Pagpanggawas sa senior citizens susihon sa kagamhanan sa Cebu City
CEBU, Philippines — Ang kagamhanan sa Dakbayan sa Sugbo nakig-alayon sa kapitan sa Barangay Mambaling Gines Abellana kalabutan sa pagpanggawas sa mga senior citizen sa ilang lugar.
Kini ang gibutyag ni Atty. Rey Gealon, tigpamaba sa kagamhanan sa Dakbayan sa Sugbo.
Gikataho nga ang maong mga senior citizen nanggawas sa ilang mga balay tungod kay wala na kini makahuwat nga ihatud diha sa ilang mga balay ang ayuda alang kanila.
Sayo pa, nag-viral diha sa social media ang hulagway sa mga senior citizen nga nagtapok diha sa gym sa Barangay Mambaling diin naalarma ang mga netizen niini ug ubang mga tawo.
Nakita diha sa post sa social media nga wala masunod ang social distancing diin delikado kini sa pagtakod sa covid-19 ilabi na nga daghang nagpositibo sa virus dihia sa nahisgutang barangay.
Nunot sa maong hitabo ang siyudad mohimo og pakisusi kalabot niini.
Matud ni Gealon nga klaro ang kamandoan ni Mayor Edgardo Labella nga “house to house” ang pagpang-apod-apod sa hinabang pinansiyal sa mga senior citizen.
Hangyo ug panawagan sa siyudad sa mga tawo sa barangay nga pailob lang tungod kay moabot ra gyud diha sa ilaha ang hinabang pinansiyal sa gobiyerno nga gitagana alang nila. /BDB (BANATNEWS)
- Latest