COVID-19 update: 394 na ang nangaayo sa Cebu City

CEBU, Philippines — Miabot og 164 ka mga kanhi COVID-19 positive sa Cebu City ang nangaayo na kagahapong adlawa Mayo 28,2020 sumala pa sa Cebu City Health Department.

Ang 164 ka mga recoveries nga natala gikan sila sa Barangay Suba nga 114, samtang 33 sa Barangay Bacayan, 15 sa Barangay Mambaling ug duha sa Barangay Sambag 2.

Tungod sa maong gidaghanon niabot na tanan sa 394 ang recoveries sa mga nataptan sa COVID-19 dinhi sa siyudad kagahapong adlawa.

Sa pikas bahin, 2,013 na ang natalang kaso sa Coronavirus Disease(COVID)-2019 sa siyudad base sa datos sa  CCHD. Nakadugang sa gidaghanon sa kaso ang 21 ka mga bag-ong kumpirmadong mga kaso sa siyudad.

Ang duha nagagikan sa Barangay Tejero; usa sa Barangay Lahug, usa sa Barangay Inayawan, tulo sa Barangay Duljo Fatima, usa sa Barangay Sawang Calero, usa sa Barangay Kinasang-an ingon man usa sa Barangay San Nicolas.

Samtang pito ka kaso ang natala sa Barangay Suba, usa  sa Barangay Camputhaw, usa sab sa Barangay Mambaling, usa sab Pardo, ug laing usa sa Barangay Carreta.

Samtang sa pikas bahin, ang Mandaue City adunay tulo ka bag-ong kompirmadong kaso sa COVID-19 kagahapong adlawa, May 27, 2020.

Ang usa kanila 66 anyos nga babaye nga taga ML Quezon St., Maguikay; samtang ang usa 46 anyos nga lalaking taga Sitio Sudlon, Maguikay ug ang ikatulo mao ang 54 anyos nga lalaking taga Zone Gabi, Paknaan.

Matud pa ang duha kanila napaubos sa rapid testing ug nakita didto nga IGM antibody positive sila maong gipaubos silang duha sa confirmatory RT-PCR Test ug didto nakita nga positibo sila sa COVID-19.

Sumala pa sa Mandaue City Public Information Office, ang DRRMO personnel nag- decontaminate na sa mga dapit nga gipuy-an sa tulo samtang gipahigayon na ang contact tracing.

Tungod niini, miabot na og 237 ka kompirmadong kaso sa COVID-19 ang natala sa maong dakbayan, 12 na ang nangaayo ug upat ang nakalas sa maong sakit.  Sa pikas bahin, duha ka mga molupyo sa Sitio Ibabao sa Barangay Agus ug Barangay Mactan maoy bag-ong natala nga kaso sa Dakbayan sa Lapu-Lapu sumala pa sa pahibalo ni Mayor Junard ‘Ahong’ Chan.

Ang mayor miingon nga kinahanglang mag-amping sa ilang kaugalingon sa tanang oras ang mga Oponganon aron malikay sa COVID 19.

Ang duha gibalhin na sa isolation facility nga naglakip sa Lapu-Lapu City College ug laing duha pa ka mga publikong tulunghaan sa dakbayan. Samtang gihimo na ang contact tracing sa mga tawong kataposan nilang nakauban. Romeo T Limpangog/IBM (BANATNEWS)