Garcia miamendar sa EO pahaom alang sa Simbahan

CEBU, Philippines — Niluwat og Executive Order si Gobernador Gwendolyn Garcia aron amendahan ang usa ka bahin sa iyang Executive Order No. 17 kalabot sa kalihokan sa simbahan kun ipatuman na ang new normal karon nga gipaubos na ang lalawigan sa general community quarantine.

Sa iyang EO 17, gidili ang social gatherings, tourism activities, ug gambling nga moresulta sa “close persons-to-persons  contact” ug panagtapok sa mga tawo.

Sa maong EO usab wala gitugot ang pagpahigayon og Santos nga Misa ug ubang relihoyosong kalihokan.  Apan sa iyang bag-ong giluwatang EO, gitugot na ang maong kalihokan.

“Niini nga bag-ong executive order kay nag amendar sa maong nga section, atone gi-allow, dili encourage, wala nato gi-encourage apan ugaling mag gathering sa simbahan kutob ra og napulo (10) ka tawo,” matud ni Garcia.

“Gatherings that are for the provision of critical government services while adhering to the prescribed minimum health standards shall be allowed” pagbasa sa iyang bag-ong giluwat nga EO No. 17-A.

Ang maong amendment ni Garcia pinasubay sa national guidelines sa Inter-Agency Task Force (IATF).

Sa laing bahin, si Archbishop Jose Palma sa Sugbo miawhag sa mga magtutuo nga tumanon ang mga protokol kun hingpit nang buksan sugod karon Hunyo 1 ang mga simbahan.

Ang simbahan duna nay gipagawas nga mga protocols ug guidelines nga ipasunod sa mga parokya, sama sa pagtuman sa social distancing, pagsul-ob ug facemask lakip usab ang dili paghikap-hikap sa mga imahe sa mga santos ug uban pa. Sumala pa ni Palma, mas maayo sundon sa mga tawo ang maong mga lagda alang sa panglawas sa katawhan.

Dul-an sa duwa ka bulan gipahigayon sa mga simbahan ang Missa Sine Populo, o ang pagpahigayon og Santos nga Misa nga walay mga tawong gipatambong apan kini gi-live stream o gipadungog sa radio aron makapaminaw ang mga tumutuo. /IBM (BANATNEWS)