Tuob gustong ipabuhat sa mga tawo

CEBU, Philippines — Gikalipay ni Konsehal Jerry Guardo ang tubag sa mga tawo labot sa steam inhalation o mas naila sa tawag nga tuob. Si Gob. Gwendolyn Garcia miawhag sab sa katawhan pagbuhat niini aron pagpalig-on sa lawas tungatunga niining hulga sa coronavirus disease (COVID-19). Gihulagway sa konsehal nga walay side effect ang tuob sanglit tradisyonal kini nga pamaagi ug dili sab kinahanglan mogasto og dako aron makahimo niini.

Nunot niini, tinguha ni Guardo nga ipakatap kini diha sa kabarangayan maong magtukod siya og Task Force Tuob kay gusto niya makat-on ang mga tawo kun unsay saktong pamaagi sa pagtuob.

Ang task force volunteers maoy mang-distribute kada balay sa mga flyers sa five-easy steps unsaon pagtuob. Ang pagtuob gitudlo sa karaan pagpanambal isip alternatibong pamaagi pagtambal sa mga tawong adunay trangkaso ug kadtong barado ang ilong tungod sa grabeng sip-on.

Ang pamaagi niini, mao ang pagtuob og baga nga habol ug pagbutang og ininit nga tubig sa takori o kaldero nga butangan og dahon sa buongon, mint leaves, ug uban pang klase-klaseng herbal nga mga dahon.

Ang hinungaw o alisngaw niini matuob sa sud sa habol nga gitabon sa gitrangkaso ug matud pa ang kainit nga mapundo sa sud maoy makahatag og alibyo sa pagginhawa sa pasyente.

Samtang duna say laing proyekto ang Konsehal nga gitawag niya og ‘tuob challenge’ diin tumong sa maong proyekto pagdasig sa mga tawo paghimo niini.

Sigon ni Konsehal Guardo daghan ang testimonya nga giingong nakauyon gyud sa tuob maong tinguha sa Konsehal nga ang tanan mohimo niini aron makatabang nga mabatukan ang COVID-19.  “Ang objective ana nga project is to really encourage peopleo to do steam inhalation. I heard a lot of testimonies, healthy ilang panglawas, daghan sab symptomatic nga niarang-arang sab ilang paminaw. Gusto nako this practice tuob would become a household name nga tanan would be using it para you feel more confident in fighting this COVID-19,” asoy ni Guardo. /IBM (BANATNEWS)