Mga traysikol sa Mandaue pwede na unyang mamasada

CEBU, Philippines — Mahimo na unya nga makapamasahero ang mga traysikol sa Dakbayan sa Mandaue sa higayon nga ma-down grade na unya kini gikan sa enhanced community quarantine ngadto na sa general community quarantine.

Nunot niini, isip kabahin sa gihimong pagpangandam atol sa ilang regular session gipalabang sa konseho sa siyudad ang resolusyon sa pasagop  sa mga bag-ong kausaban nga maoy mogiya sa mga drayber sa traysikol ug mga operator ang mga bag-ong lagda ubos na sa new normal nga ipatuman sa lokal nga kagamhanan.

Si  Konsehal  Jimmy  Lumapas, chairman  sa committee on transportation and utilities communication, and market maoy nangamahan  sa maong resolusyon nga giaprobahan usab sa konseho sa dakbayan.

Ubos sa maong resolusyon gitataw nga ang mga traysikol walay labot sa gipatuman nga number coding protocol apan kinahanglan nga mosubay kini sa mga lagda ug magbaton kini og special permit nga giluwatan sa kagamhanan sa maong dakbayan ug mamasahero lang kini diha sulod sa gitugot  nga lugar nga pabiyahian. Sa panahon sa pagbiyahe kinahanglan nga dad-on sa drayber sa traysikol ang special permit to operate, driver’s license, quarantine pass ug magsul-ob gyud og facemask and drayber.

Gipaubsan usab ang capacity sa mosakay diin usa lang ka pasahero ug giusbawan usab ang plete ngadto na sa P25 isip patuman sa social distancing ug health protocol diin ang pasahero kinahanglang magsul-ob usab kini og face mask. /BDB (BANATNEWS)