Siyam ka polis sa Pardo positibo sa COVID-19
CEBU, Philippines — Dugang siyam ka polis lakip na ang usa ka opisyal sa Pardo Police Station sa Cebu City ang nagpositibo sa novel coronavirus (COVID-19) sa bag-ong gipagawas nga resulta sa swab test sa mga personahe ug mga inmates sa maong buhatan.
Niadtong Lunes sa gabii gibalhin ang siyam ka polis ngadto sa isolation facility sa Cebu City Police Office (CCPO) sa Don Vicente Rama Memorial School.
Matud ni Cebu City Police Office (CCPO) Director Police Colonel Josefino Ligan nga sagad sa mga polis nga nataptan sa COVID natakdan sa dinakpan nila sa mga suspek sa illegal nga drugas.
Si PRO7 Regional Director Police Brigadier General Albert Ferro mibutyag nga pulos asymptomatic kun walay sintomas nga gibati ang siyam ka mga polis lakip na ang usa ka opisyal.
Kahinumdoman nga maong mga polis nakadakop og lima ka mga drug suspects nga napositibo sa COVID-19.Mao nga gipaubos ang tanang personahe sa maong buhatan sa swab test ug nigawas nga sa 73 ka mga sakop niini, siyam ang nataptan sa maong virus.
Sa Cebu City, kapin 30 ka mga polis niini ang natakdan sa virus ug usa pa ang hingpit nga naayo. /IBM (BANATNEWS)
- Latest
