100 ka vendors nakadawat na sa groceries gikan sa DOLE

CEBU, Philippines — Gihatag na kagahapon ngadto sa 100 ka vendors sa Dakbayan sa Sugbo ang groceries ubos sa Pangkabuhayan Project sa Department of Labor and Employment (DOLE).

Ang pagpanghatag sa groceries gipahigayon diha sa Plaza Independencia.

Kahinumduman nga 400 ka vendors sa siyudad ang naapektohan sa pagpatuman sa Memorandum Circular 121 sa Department of Interior and Local Government (DILG) diin naglimpiyo kini sa mga sidewalk.

Ang pangulo sa Prevention Restoration Order Beautification Enhancement (PROBE) Raquel Arce nipasabot nga wala makaabot sa P20,000 ang grocery items nga nahatag sa mga vendors ug gipasalig niini nga kadtong kuwang madawat gihapon sa mga manindahay alang sa repeat order nga pagahimuon.

Gani gawas sa P20,000 nga ayuda gikan sa DOLE ang kagamhanan sa siyudad adunay counterpart nga P5,000 cash alang sa pagtukod sa mga manindahay sa tindahan,  magamit usab kining bayad sa  kuryente o bayad sa abang sa tindahan.

Sa paghatag sa mga grocery items gibalik og pasabot ni Arce ang mga manindahay nga dili kini pangkunsumo apan alang kini sa negosyo o ilang ibaligya.

Karong adlawa, laing 100 ka vendors ang makadawat sa maong grocery items, sa adlawng Huwebes laing 100 na usab ka manindahay ang hatagan ug sa adlawng Biyernes mag-house to house sila sa distribution alang sa mga senior citizens nga apil sa nakabenepisyo niini.

Sa mga miyembro nga na-lockdown ihatod kini sa PROBE diha sa ilang lugar ug awhag nila nga dili mogawas tungod kay dili sila ma-entertain. /BDB (BANATNEWS)

Quarantine facility sa IEC gi-turnover na sa DOH-7

Rowena D. Capistrano

CEBU, Philippines — Si Archbishop Jose Palma sa Archdiocese of Cebu ang nangulo sa hingpit nga pagbukas kagahapon sa bag-ong Quarantine Facility Bayanihan Cebu IEC Field Center.

Nitambong usab sa kalihukan si Secretary Michael Dino sa Office of the Presidential Assistant for the Visayas, Gobernador Gwendolyn Garcia, Mayor Edgardo Labella, Mayor Junard Ahong Chan, Mayor Jonas Cortes, Director Jaime Bernadas sa Department of Health (DOH)- 7 ug ubang mga opisyal sa nagkadaiyang ahensiya.

Ang blessing ug turnover sa Bayanihan Cebu IEC Field Center gihimo aron sa pagtabang sa pagpaloag sa mga hospital diin aduna kini 130 ka beds, fully air-conditioned negative air pressure shelter bays sa lima ka isolation room.

Ang pasilidad aduna usab kini medical-grade hepa filters nga maglimpiyo sa hangin nga mogawas aron sa pagsiguro nga luwas ang mga pasyente, frontliners, staff ug uban mga silingan sa komunidad.

Ang katumanan sa maong quarantine facility usa ka multi-sectoral partnership tali sa mga nagkadaiyang ahensiya ug sa mga private sector.

Matud ni Bayanihan Cebu City Executive Committee Member Edmun Liu nga ang quarantine facility mag-cater sa covid-19 positive patients nga nagkinahanglan og medical care. /BDB (BANATNEWS)