Mayor Labella maminaw una sa mga eksperto ayha modesisyon

CEBU, Philippines — Karong nahuman na ang gihimong strategic mass testing sa nakalabay nga semana, si Cebu City Mayor Edgardo Labella nagkanayon nga ang sunod nga buhaton mao ang koordinasyon tali sa mga health officials , publiko ug pribadong sektor.

Sumala pa sa mayor, tukion niini ang kabahin sa estado sa siyudad nga karon padayon pang ubos sa enhanced community quarantine (ECQ) tungod sa COVID-19 pandemic.

Sa pagkakaron, dili pa makakomento ang mayor kun  kinahanglang lugwayan pa o paubsan ang ECQ ini og Marso 31, 2020. Matud niya nga kinahanglan niyang paminawon ang ikasulti sa mga eksperto bahin niini.

“We have to be very careful, circumspect about this,” matud ni Labella.

Marso 28  sa dihang gipaubos ni Labella ang siyudad sa ECQ aron pahugtan ang tinguhang pagpugong sa pagkatap sa COVID-19, matapos unta kadto niadtong Abril 28, apan unom ka adlaw sa wala pa ang deadline, gilugwayan kini sa mayor kutob sa Mayo 15, tunod kay padayon ang pagdaghan sa mga kaso.

Mayo 15, si Labella mipagawas og laing executive order aron ipaubos sa modified enhanced community quarantine apan giusab kini sa mayor pagkasunod adlaw ug gibalik sa ECQ human nga ang siyudad giapil gihapon sa Inter-Agency Task Force on Emerging Infectious Disease sa mga dapit nga gikonsiderar nga high-risk sa COVID-19 infections.

Tungod niini, gitagalan nasab kutob sa Mayo 31 ang ECQ sa Cebu City kauban sa Metro Manila ug Laguna apan adunay modipikasyon sa mga protokol. Apil ang Mandaue City pabilin sa ECQ  kutob sa Mayo 31.

Hinuon nanawagan si Labella sa katawhan nga bisan og paubsan ngadto sa MECQ karong Mayo 31 ang siyudad, unta magpabilin ang disiplina sa tanan ug magmatngon nga dili mataptan pinaagi sa pagsunod sa tanang mga protokol sama sa pagsuot kanunay og facemask, pagtuman kun dunay mando nga dili mogawas sa balay ang usa ka tawo o pamilya, ipadayon ang social distancing ug uban pa.

“The people should adopt discipline so that we can contain the spread of the virus,” matud ni Labella. Ang strategic community testing kabahin sa Project Balik Buhay nga gilangkuban sa Cebu City, Mandaue City ug Lapu-Lapu City inabagan sa Department of Health in Central Visayas ug Office of the Presidential Assistant for the Visayas (OPAV).

Ang tumong niini nga makakuha og scientific data kun pila gyud ang mga kaso sa COVID-19 sa maong mga siyudad aron makapagawas sila og rekomendasyon base sa ebidensya ug may igong basehan pagpagawas og sunod nga rekomendasyon.

Sa laing bahin, subling gipaubos sa lockdown ang Sitio Zapatera sa Barangay Luz human nga kini gipaablihan na niadtong Mayo 20 human nasuta nga duna pay siyam ka mga pasyente ang wala pa mapaubos sa swab test. /IBM (BANATNEWS)