Santos nga Misa sugdan na sa unang adlaw sa Hunyo

CEBU, Philippines — Ang missa cum populo o Santos nga Misa uban sa mga tawo gikatakdang ipahigayon sugod karong Hunyo 1, 2020.

Kagahapon atol sa Feast of the Lord’s Ascension gipahibalo sa parokya sa Nuestra Señora Patrocinio de Maria sa Lungsod sa Boljoon nga sugod karong Hunyo 1 niining tuiga gitugotan na sila sa pagsaulog sa Santos nga Misa sulod sa simbahan uban sa mga parokyano apan kinahanglan hugot nga iimplementar ang mga regulations sama sa physical distancing, pagsul-ob og facemask, gidili ang paghikap ug paghalok sa mga imahen sulod sa simbahan ug walay holy water nga ibutang diha sa mga pultahan.

Atol sa missa cum populo kinahanglan usab mosunod ang katawhan sa entrance ug exits sa simbahan ug lakip usab ang paggamit sa thermal scanner.

Ang mga manimbahay kinahanglang molingkod sa mga lingkuranan nga gitagana tungod kay limitado lang ang makasulod panahon sa Santos nga Misa apan adunay pipila ka lingkuranan nga ibutang diha sa palibot.

Si Monsignor Arthur Navales, padre kura sa nahisgutang simbahan nagkanayon nga adunay himuon nga regular nga pag-disinfect sulod ug gawas sa simbahan diin magbutang og footbath containers diha sa pultahan ug mga alcohol.

Matud ni Navales nga samtang magpadayon ang katawhan sa pagpadayag sa ilang Kristohanon nga pagtuo angayan usab kanunayon ang pagtuman sa mga gidili ug angay buhaton ubos sa general community quarantine sa probinsiya. /BDB (BANATNEWS)