6T pamilya nakadawat hinabang gikan CPPO

CEBU, Philippines — Moabot na ngadto sa kapin 6,000 ka pamilya sa tibuok Probinsya sa Sugbo ang nakadawat og ayuda gikan sa Cebu Provincial Police Office (CPPO).

Kini subay sa gipahigayon nga Kapwa ko Sagot ko Program sa kapolisan diin anaa sa walo ka lungsod sa probinsya ang nahatagan.

Matud ni CPPO Director Police Colonel Roderick Mariano nga gipang- identify nila ang mga labing pobre ug labing layo nga mga barangay nga maoy maka benepisyo sa hinabang alang sa mga kabus.

Dugang pa ni Mariano nga ang kwarta nga gigamit sa pagpalit sa mga hinabang gikan mismo sa kaugalingong bulsa sa kapolisan sa probinsya.

Gitinguha ni Mariano nga mahatagan og hinabang ang tanan nga mga kabus sa probinsya sa sugbo ilabi na gyud ang mga nagpuyo sa mga lagyo nga lugar ug barangay sama sa Camotes Island, Bantayan, Santander, ug sa lungsod sa Tuburan.

Gilangkuban ang mga relief goods nga gipanghatag sa duha ka kilo nga bugas, canned goods ug noodles.

Si Grace Arbor dako og pasalamat ngadto sa kapolisan sa hinabang nga gihatag kanila ilabi niining panahon sa pagkuyanap sa COVID-19 nga mimenos  ang ilang income. /LPM (BANATNEWS)