Mga positibo sa COVID-19 sa Mandaue gipahimutang na sa quarantine facility

CEBU, Philippines — Gipahimutang na sa gitagana nga quarantine facility sa Dakbayan sa Mandaue kadtong mga positibo sa coronavirus disease (covid-19) nga gipaubos sa rapid test.

Ang mga walay gipamati sa lawas o asymptomatic nga positibo sa covid-19 test nga gihimo ang gipahimutang diha sa quarantine center sa Mandaue City Central School sa dalan Catalino U. Ouano Avenue sa Barangay Centro.

Si Konsehal Nerissa Soon-Ruiz, chairman sa committee on health sa konseho  sa maong dakbayan nagkanayon nga ang mga gipahiluna diha sa quarantine center ang gihatagan og higpit nga pag-atiman pinaagi sa pag-monitor  sa mga health personnel sa ilang panglawas ug gihatagan usab sila sa tanan nilang gikinahanglan.

Ang mga nagpositibo  sa rapid test ipaubos usab sila sa swab test ug kon positibo gihapon dad-on na sila ngadto sa Vicente Sotto Memorial Medical Center sa Dakbayan sa Sugbo. Sa ulahing natala nga gidaghanon nga kaso sa covid-19  sa Dakbayan sa Mandaue  niabot na kini ngadto sa 219  diin ang 184 niini mao ang mga person deprived of liberty  sa Mandaue City Jail  samtang pito ang naka-recover ug tulo ang namatay. – Romeo T. Limpangog/BDB

Tumulak niapelar sa DepEd nga lugwayan ang pagpagamit sa mga tunghaan

Si Konsehal Dave Tumulak sa Dakbayan sa Sugbo niapelar sa Department of Education (DepEd)-7 labot sa desisyon sa ahensiya nga kutob nalang sa Hunyo 15 niining tuiga ang paggamit sa mga tunghaan isip Barangay Isolation Center(BIC).

Si Tumulak nihangyo sa DepEd nga lugwayan ang pagpagamit sa mga tunghaan isip BIC hangtud nga modeklara na ang Cebu City Health Department nga luwas na ang siyudad sa Sugbo sa covid-19.

“Karon man gud nagkaanam man gud og kadaghan, naa say mga pasyente nga on going pa ang ilahang isolation nga molapas sa ilahang gihatag nga deadline”, pasabot ni Tumulak.

Kahinumduman nga ang mga tunghaan karon sa Cebu City gihimong Barangay Isolation Center diin diha gipahimutang ang mga covid-19 positive patients nga mga asymptomatic o mga walay sentomas sa virus aron matambalan sa mga personnel sa Cebu City Health Department.

Nikabat sa 10 ka tunghaan sa Cebu City ang gihimong BIC sa kagamhanan sa Dakbayan sa Sugbo ilabi na nga daghan usab ang kaso sa covid-19 sa siyudad.

Si Tumulak nagpasalamat sa kadagkoan sa DepEd, magtutudlo ingon man sa mga ginikanan sa pagtugot sa mga positive covid-19 patients nga magpundo diha sa BIC.

“Imagine if naa pa sa ato community how risky sa ila family and neighborhood, it might double positive covid patients, and besides that’s part of healing process psychologically and physically sa patients while inside BIC, mostly positive covid patients experiencing discrimination sa community meanwhile sa school wala”, padayag ni Tumulak.

Matud ni Tumulak nga sa kasamtangan aduna pay mga positive covid patients kada adlaw base sa resulta nga gipagawaas sa Department of Health (DOH) ug kinahanglan sila nga i-isolate sulod sa 14 ka adlaw ug human niini kuhaan sila pagbalik og swab.

Ug kon magnegatibo sa ikaduhang higayon makauli na sila sa ilang panimalay.

Si Tumulak nagkanayon nga human sa krisis sa covid-19 ilang i-disinfect ang mga tunghaan alang unya sa pag-abli sa klase.

Si Tumulak niawhag na usab sa katawhan nga motuman sa mga protocol batok sa covid-19 lakip niini ang pagpundo sa balay, mo-observed sa social distancing, magsul-ob og face masks, proper hygiene ug palig-onon ang immune system.

 “Gipangkapoy na atong mga medical frontlines, barangay officials, workers, volunteers, government officials, employees and volunteers, all is left is our faith and dedication to serve”, dugang ni Tumulak. /BDB (BANATNEWS)