Kaso sa COVID-19 sa Cebu City hapit moabot sa 2,000

CEBU, Philippines — Hapit na moabot sa 2,000 ang kaso sa coronavirus disease o COVID-19 sa dakbayan sa Sugbo base sa rekord sa Cebu City Health Department.

Sa kagahapon nga datos sa Cebu City Health Department, mokabat na sa 1,872 ang kaso sa COVID-19 human nga adunay 18 ka mga bag-ong kaso ang nadugang.

Ang 18 ka mga bag-ong kaso gikan sa Barangay Duljo Fatima nga duha, tulo sa Block 3 Barangay Suba, usa sa Alveola Street sa Barangay Tejero, usa sa Barangay Punta Princesa, usa sa Barangay Hipodromo, usa sa Villa Manga sa Barangay Basak Pardo, tulo sa Sentro sa Barangay Mambaling, duha sa Lincoln Street sa Barangay Ermita, usa sa Barangay Labangon, usa sa Panaghiusa sa Barangay Basak San Nicolas ug duha sa Magsaysay Street Barangay Pasil.

Kasagaran sa mga kaso sa Cebu City mga asymptomatic o wala’y sintomas sa COVID-19. Sila gidala na karon sa mga Barangay Isolation Centers aron matambalan sa mga tinugyanan sa Cebu City Health.

Ang kagamhanan sa siyudad sa Sugbo padayon nga nanawagan sa katawhan nga padayong magpondo sa balay ug dili mogawas aron malikayan ang virus. /LPM (BANATNEWS)