MCIA magbutang og swab test laboratory

CEBU, Philippines — Mobutang ang GMR-Megawide Cebu Airport Corporation (GMCAC) og “state-of-the-art” nga laboratory facility sulod sa Mactan-Cebu International Airport (MCIA).

Ang maong pasilidad alang sa swab test sa mga Overseas Filipino Workers (OFW) ug seafarer nga moabot sa Sugbo lakip na sa laboratory nga makahatag og dali nga resulta sa swab test sa coronavirus disease.

Si Andrew Harrison, GMCAC chief executive advisor, atol sa iyang pagpakigtagbo ni Gob. Gwendolyn Garcia nagkanayon nga pamaagi kini sa ilang kompaniya aron makatabang sa gobiyerno nga madali ang pagproseso sa mga mouli nga mga OFW sa Sugbo.

“We believe we can provide additional capacity to DOH for testing OFW upon arrival so that Cebu can also have international arrivals,” matud ni Harrison.

Sa pagkakaron ang proseso sa mga OFW nga mouli sa Pilipinas, adto sa Manila moabot agi sa Ninoy Aquino International Airport ug adto kuhaan og test ug ipaubos sa kwarantina.

Matud niya nga sa pagkakaron moabot sa 20,000 ang backlog sa mga OFWs nga naghuwat nga maproseso aron hingpit nga makauli sa ilang tagsa-tagsa ka lugar sa nasud wala pay labot kadtong mga anaa pa sa ubang nasud nga gusto usab mouli tungod sa Covid-19 pandemic.

Matud ni Harrison nga ang GMCAC mo-convert sa baggage claim hall sa MCIA Terminal-2 ngadto sa laboratory diin ang command center butangan og luna alang sa mga personnel sa Department of Health ug Bureau of Quarantine.

Tinguha nila nga maka-test og 900 ka OFWs ug seafarers pinaagi sa Polymerase Chain Reaction (PCR) Test.

Ang GMCAC makig-alayon sa Prime Care Clinic alang sa operasyon sa laboratory ug testing facility nga mo-operate 24/7 pinaagi sa tulo ka shift.

Matud ni Harrison nga walay gastuhon ang gobiyerno sa pagbutang sa maong laboratory. /GMR (BANATNEWS)