PRO-7 nangandam sa GCQ sa Cebu City, Mandaue

CEBU, Philippines — Napulo ka adlaw sa dili pa libkason ang Enhanced Community Quarantine sa Dakbayan sa Sugbo ug Mandaue, gipangandaman na sa Police Regional Office 7 ang General Community Quarantine sa Central Visayas.

Matud ni PRO-7 director, Police Brigadier General Albert Ferro, nga makig-alayon ang kapolisan sa mga security officers sa mga malls alang sa istriktong pagpatuman sa physical distancing.

Usa sa mando sa Kampo Crame ang pagbutang og daghang polis sa malls apan matud ni Ferro nga ilang sabotan kini uban ang mga mall security officials aron matuman gihapon ang social      distancing.

Gitahasan ni Ferro ang iyang ground commander nga makigtagbo sa mga mall owners o kaha mga security officers alang sa plano karon pa lang aron dili magyagaw inig abot sa panahon nga mahimo na nga mobalik sa normal ang sitwasyon sa Dakbayan sa Sugbo.

Gikinahanglan nila ang kooperasyon sa mga mall security labot sa pagtuman sa protocol nunot sa kabalaka nga mosaka na sab ang mataptan sa coronavirus disease.

Usa ka semana sa dili pa mag-abli ang mga dagkung tindahan manghatag sila og mga flyers nga adunay nakabutang nga unsay angayan nga buhaton ug unsay dili aron masayud ang publiko labot sa gustong ipatuman sa kapolisan ug sa tagdumala sa mga establisemento. /GMR (BANATNEWS)