Duha ka LGU gihatagan og lugway sa DSWD sa paghatag sa SAP

CEBU, Philippines — And Department of Social Welfare and Development (DSWD)-7 nihatag og extension sa duha ka Local Government Units (LGUs) hangtud sa Mayo 22, 2020 adlaw’ng Biyernes sa pagpanghatag og ayuda.

Kini ang gitug-an sa assistant director sa DSWD-7 Shalaine Lucero nga nahinabi sa Banat News. Ang nahisgutang mga siyudad mao ang mga Dakbayan sa Sugbo ug Mandaue.

Matud ni Lucero nga ang nahisgutang mga dakbayan ilang gihatagan og konsiderasyon sa pagpahigayon sa ilang payout aron makadawat ang mga pamilya nga qualified sa ilang ayuda.

Gibutyag ni Lucero nga human sa adlaw nga Biyernes makigtagbo sila sa mga LGU diin tukion nila kong aduna pay mga wala makadawat sa ilang mga ayuda.

Usa sa mga rason nga nakita sa kalangay sa pag-apod-apod sa maong ayuda mao ang wala pagsumiter sa tukma nga panahon sa listahan ug dili usab kompleto ang mga listahan sa makadawat sa Social Amelioration Program.

Si Lucero naglaom nga mahuman sa pagpanghatag sa LGU ang ayuda ngadto sa mga kwalipikadong pamilya subay sa gihatag nilang lugway. /BDB (BANATNEWS)